नेपाल स्वास्थ्य, यही जेठ १८ देखि आगामी असोज १४ सम्मको मनसुन ऋतुमा देशका अधिकांश स्थानमा सरदर भन्दा बढी वर्षा हुने भएको छ । जल तथा मौसम विज्ञान विभागका महानिर्देशक कमलराम जोशीले अधिकतम तापक्रम र न्यूनतम तापक्रमसमेत देशभर सरदरभन्दा बढी रहने सम्भावना रहेको बताएका छन्। कर्णालीको पूर्वी, लुम्बिनीको उत्तरी र गण्डकीका अधिकांश भूभागमा सरदरभन्दा धेरै वर्षा हुने सम्भावना ५५ देखि ६५ प्रतिशत छ।
सुदूरपश्चिमका तराई, लुम्बिनीका पश्चिम तराई, गण्डकीको उत्तर, पूर्वी भूभाग, बागमती र कोशीका उत्तरी भूभागमा पनि सरदरभन्दा धेरै वर्षा हुने आँकलन छ। तर, मधेशका पूर्वी र दक्षिणी भेगमा सरदरभन्दा बढी वर्षाको सम्भावना ३५ देखि ४५ प्रतिशत छ। विभागका अनुसार यस आँकलन विश्व मौसम सङ्गठनको विश्वभर तथा क्षेत्रीयस्तरको जलवायु सूचना उत्पादन गर्ने केन्द्रको हावापानी प्रारूपहरूको आँकलन र दक्षिण एसियाली जलवायु मौसमी दृष्टिकोण मञ्च आँकलनको आधारमा तयार पारिएको हो।
प्रकाशित मिति: २०८२ जेठ ८ गते, बिहान ६:२९ बजे
